യുകെ : അമൃത്സറിൽ നിന്ന് ബർമിംഗ്ഹാമിലേക്ക് പോയ AI117 എയർ ഇന്ത്യ വിമാനത്തിൽ സാങ്കേതിക തകരാർ കണ്ടെത്തി. എയർ ടർബൈൻ (RAT) അപ്രതീക്ഷിതമായി പുറത്ത്‌ എത്തി.
വിമാനം ലാൻഡിംഗിനായി അവസാന ഘട്ടത്തിലേക്ക് കടക്കുന്നതിനിടെ റാം എയർ ടർബൈൻ (RAT) അപ്രതീക്ഷിതമായി വിന്യസിച്ചതായി ഓപ്പറേറ്റിംഗ് ക്രൂവിന്റെ ശ്രദ്ധയിൽപ്പെടുകയായിരുന്നു.
എന്താണ്‌ RAT?
വിമാനങ്ങളിൽ റാം എയർ ടർബൈൻ (RAT) പ്രധാനമായും ഒരു അടിയന്തര സംവിധാനമാണ്. വിമാനത്തിലെ പ്രധാന ഇലക്ട്രിക്കൽ അല്ലെങ്കിൽ ഹൈഡ്രോളിക് സിസ്റ്റങ്ങളിൽ തകരാറുണ്ടാകുമ്പോഴോ അല്ലെങ്കിൽ വൈദ്യുതി സംവിധാനം മൊത്തത്തിൽ നിലയ്ക്കുന്നതടക്കമുള്ള അടിയന്തിര സാഹചര്യങ്ങളിലോ അത് അത്യാവശ്യമായ വൈദ്യുതി സംവിധാനങ്ങളെ ചലിപ്പിക്കുന്നതിനായി യാന്ത്രികമായി സജീവമാകും. RAT ഉള്ളത് കൊണ്ട് മാത്രം വിമാനം അപകടം തരണം ചെയ്യില്ല.
വിമാനം ബർമിംഗ്ഹാം വിമാനത്താവളത്തിൽ സുരക്ഷിതമായി ലാൻഡ് ചെയ്തു, യാത്രക്കാരും ജീവനക്കാരും പൂർണ്ണമായും സുരക്ഷിതരാണെന്ന് എയർ ഇന്ത്യ അറിയിച്ചു.
“2025 ഒക്ടോബർ 4-ന്, അമൃത്സറിൽ നിന്ന് ബർമിംഗ്ഹാമിലേക്കുള്ള AI117 വിമാനത്തിലെ ഓപ്പറേറ്റിംഗ് ക്രൂ, ലാൻഡിംഗിന് തൊട്ടുമുമ്പ് വിമാനത്തിന്റെ റാം എയർ ടർബൈൻ (RAT) വിന്യാസം കണ്ടെത്തി. എല്ലാ ഇലക്ട്രിക്കൽ, ഹൈഡ്രോളിക് പാരാമീറ്ററുകളും സാധാരണ നിലയിലാണെന്ന് അന്വേഷണത്തിൽ കണ്ടെത്തി, വിമാനം സുരക്ഷിതമായി ലാൻഡ് ചെയ്തു,” എന്ന് എയർ ഇന്ത്യ പ്രസ്താവനയിൽ വ്യക്തമാക്കി.
വിശദമായ പരിശോധനയ്ക്കായി വിമാനം നിലത്തിറക്കിയിട്ടുണ്ടെന്നും കമ്പനി അറിയിച്ചു. സ്റ്റാൻഡേർഡ് ഓപ്പറേറ്റിംഗ് നടപടിക്രമങ്ങൾ (SOP) അനുസരിച്ചാണ് ഈ നടപടി.
തുടർന്ന് , ഈ വിമാനം നടത്തേണ്ടിയിരുന്ന ബർമിംഗ്ഹാമിൽ നിന്ന് ഡൽഹിയിലേക്കുള്ള AI114 എന്ന മടക്ക വിമാനം റദ്ദാക്കി. ഈ യാത്രക്കാർക്കായി ബദൽ ക്രമീകരണങ്ങൾ ഒരുക്കിയിട്ടുണ്ടെന്നും എയർ ഇന്ത്യ അറിയിച്ചു.
ഇവിടെ പോസ്റ്റു ചെയ്യുന്ന അഭിപ്രായങ്ങൾ (യു ക് മി) UCMI കമ്മ്യൂണിറ്റിയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.