അയർലൻഡ് യൂത്ത് ക്രിക്കറ്റ് ടീമിൽ ഇടം നേടി ചരിത്ര നേട്ടവുമായി മൂന്ന് മലയാളി താരങ്ങൾ

ഡബ്ലിൻ — അയർലൻഡിന്റെ കായികരംഗത്ത് മലയാളികൾക്ക് വീണ്ടും അഭിമാന നിമിഷം. അയർലൻഡ് യൂത്ത് ക്രിക്കറ്റ് ടീമിലേക്ക് ഇത്തവണ തിരഞ്ഞെടുക്കപ്പെട്ടത് മൂന്ന് മലയാളി പ്രതിഭകളാണ്. 

ഡബ്ലിനിൽ താമസിക്കുന്ന സിദ്ധാർഥ് ബിജു, ശ്രാവൺ ബിജു, ആദിൽ നൈസാം എന്നിവരാണ് ഈ അപൂർവ്വ നേട്ടം കൈവരിച്ചത്. ഈ മൂന്ന് കളിക്കാരും തുടർച്ചയായി ഇത് രണ്ടാം തവണയാണ് അയർലൻഡ് യൂത്ത് ടീമിൽ ഇടം നേടുന്നത് എന്നത് ഈ വിജയത്തിന്റെ തിളക്കം കൂട്ടുന്നു. ഡബ്ലിനിലെ ബെല്‍വർദേ കോളേജിലെ അഞ്ചാം വർഷ വിദ്യാർത്ഥിയായ ആദിൽ ഫിനിക്സ് ക്രിക്കറ്റ് ക്ലബ്ബിന്റെ താരമാണ്. സാഗർട്ടി ലെ സിപി ഫോള സ്കൂളിലെ വിദ്യാർത്ഥികളായ ശ്രാവണും സിദ്ധാർഥും ആഡംസ്ടൗൺ ക്രിക്കറ്റ് ക്ലബ് താരങ്ങളാണ്.

പ്രതിഭകൾ ഇവരാണ്:

• സിദ്ധാർഥ് ബിജു (Under 17) & ശ്രാവൺ ബിജു (Under 15): ഡബ്ലിനിലെ സാഗർട്ടിൽ താമസിക്കുന്ന കോഴിക്കോട് സ്വദേശികളായ ബിജുവിന്റെയും ദീപ്തിയുടെയും മക്കളാണിവർ. രണ്ടുപേരും ആഡംസ്ടൗൺ ക്രിക്കറ്റ് ക്ലബ്ബിന്റെ (Adamstown Cricket Club) മികച്ച താരങ്ങളും സാഗർട്ടിലെ സിപി ഫോള സ്കൂളിലെ (Coláiste Pobail Fóla) വിദ്യാർത്ഥികളുമാണ്.
• ആദിൽ നൈസാം (Under 17): ഫിംഗ്ലാസിൽ താമസിക്കുന്ന തിരുവനന്തപുരം സ്വദേശികളായ കുന്നിൽ പള്ളിക്കൽ നൈസാമിന്റെയും നാഷണൽ മെറ്റേണിറ്റി ഹോസ്പിറ്റലിലെ ഉദ്യോഗസ്ഥയായ സുനിത ബീഗത്തിന്റെയും മകനാണ്. ഡബ്ലിനിലെ ഫിനിക്സ് ക്രിക്കറ്റ് ക്ലബ്ബിന്റെ (Phoenix Cricket Club) കളിക്കാരനായ ആദിൽ ബെൽവെദെരെ കോളേജിലെ (Belvedere College) അഞ്ചാം വർഷ വിദ്യാർത്ഥിയാണ്.

അന്താരാഷ്ട്ര ടൂർണമെന്റുകളിലേക്ക്

മലയാളി കരുത്തുമായി ഈ യുവതാരങ്ങൾ അന്താരാഷ്ട്ര വേദികളിൽ അയർലൻഡിനായി കളിക്കാൻ ഒരുങ്ങുകയാണ്:

• U17 കെൽറ്റിക് കപ്പ് (Celtic Cup): സ്കോട്ട്ലാൻഡിനെതിരെയുള്ള മത്സരങ്ങൾക്കായി സിദ്ധാർഥും ആദിലും അടങ്ങുന്ന U17 അയർലൻഡ് ടീം സ്കോട്ട്ലാൻഡിലെ ഗ്ലാസ്‌ഗോവിലേക്ക് തിരിക്കും.
• U15 ബി.എ ഫെസ്റ്റിവൽ (BA Festival): ഇംഗ്ലണ്ടിൽ വെച്ചു നടക്കുന്ന പ്രശസ്തമായ ടൂർണമെന്റിൽ അയർലൻഡിനായി പാഡണിയാനുള്ള കഠിന പരിശീലനത്തിലാണ് ശ്രാവൺ ബിജു.