വത്തിക്കാൻ സിറ്റി: ലെയോ പതിനാലാമൻ മാർപാപ്പ അടുത്തമാസം 25 മുതല്‍ 28 വരെ ഫ്രാൻസില്‍ സന്ദർശനം നടത്തും. 2008ല്‍ ബെനഡിക്ട് പതിനാറാമൻ മാർപാപ്പ നടത്തിയ സന്ദർശനത്തിന് 18 വർഷങ്ങള്‍ക്കുശേഷമാണ് ഒരു മാർപാപ്പ ഫ്രഞ്ച് മണ്ണിലെത്തുന്നത്.
25ന് പാരീസിലെത്തുന്ന മാർപാപ്പ ഫ്രഞ്ച് പ്രസിഡന്റ്, സർക്കാർ പ്രതിനിധികള്‍ എന്നിവരുമായി കൂടിക്കാഴ്ച നടത്തും. തുടർന്ന് പാരീസിലെ യുനെസ്കോ ആസ്ഥാനം സന്ദർശിക്കുന്ന മാർപാപ്പ ഉദ്യോഗസ്ഥരെ അഭിസംബോധന ചെയ്യും.
നോത്റ് ദാം കത്തീഡ്രലില്‍ സായാഹ്ന പ്രാർഥന, സെന്റ് ഡെനീസ് സ്റ്റേഡിയത്തില്‍ യുവജന പ്രാർഥനാ സമ്മേളനം, ‘ബകിത ഭവനം’ എന്ന കുടിയേറ്റകേന്ദ്ര സന്ദർശനം എന്നിവയ്ക്കുശേഷം കോണ്‍കോർഡ് ചത്വരത്തില്‍ വിശുദ്ധകുർബാന അർപ്പിക്കും.
26ന് രാവിലെ പാരീസില്‍ വിവിധ പരിപാടികള്‍ക്കും വിശുദ്ധ കുർബാനയ്ക്കുംശേഷം വൈകുന്നേരം ലോകപ്രശസ്ത മരിയൻ തീർഥാടനകേന്ദ്രമായ ലൂർദില്‍ എത്തുന്ന മാർപാപ്പ അവിടെ പ്രത്യേക പ്രാർഥന നടത്തും.
27ന് രാവിലെ ഫ്രഞ്ച് മെത്രാൻ സമിതി അംഗങ്ങളുമായി കൂടിക്കാഴ്ച നടത്തുകയും വിശുദ്ധകുർബാന അർപ്പിക്കുകയും ചെയ്യും. രാത്രിയില്‍ ലൂർദ് മാതാവിന്റെ തീർഥാടനകേന്ദ്രത്തിലെ മെഴുകുതിരി പ്രദക്ഷിണത്തിലും പ്രാർഥനകളിലും പങ്കെടുക്കും.
സന്ദർശനത്തിന്റെ അവസാനദിനമായ 28ന് മെറ്റ്സ് നഗരം സന്ദർശിക്കുന്ന മാർപാപ്പ, റോബർട്ട് ഷൂമാൻ കോണ്‍ഫറൻസ് ഹാളില്‍ മതാന്തര സമ്മേളനത്തെ അഭിസംബോധന ചെയ്യും. സെന്റ് സ്റ്റീഫൻസ് കത്തീഡ്രലില്‍ വിശുദ്ധകുർബാന അർപ്പിച്ചശേഷം റോമിലേക്ക് മടങ്ങും.
ഇവിടെ പോസ്റ്റു ചെയ്യുന്ന അഭിപ്രായങ്ങൾ (യു ക് മി) UCMI കമ്മ്യൂണിറ്റിയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.