ഇന്ത്യയുടെ 80-ാം സ്വാതന്ത്ര്യദിനവും ഇന്ത്യ-അമേരിക്ക നയതന്ത്രബന്ധത്തിന്റെ 80-ാം വാർഷികവും ഒരേ വർഷം,ഇന്ത്യയുടെ സംഭാവനകളെ പ്രശംസിച്ച്‌ അമേരിക്ക,,

വാഷിങ്ടണ്‍: ഇന്ത്യയുടെ 80-ാം സ്വാതന്ത്ര്യദിനത്തോടനുബന്ധിച്ച്‌ അമേരിക്കയിലെ നിരവധി സംസ്ഥാനങ്ങളും നഗരങ്ങളും ഓഗസ്റ്റ് 15 'ഇന്ത്യാ ദിനമായി' പ്രഖ്യാപിച്ചു.

അമേരിക്കയുടെ സമ്പദ്‌വ്യവസ്ഥ, സംസ്കാരം, സാമൂഹിക-പൗര മേഖലകള്‍ എന്നിവയില്‍ ഇന്ത്യൻ-അമേരിക്കൻ സമൂഹം നല്‍കുന്ന സംഭാവനകളെ അംഗീകരിച്ചാണ് പ്രഖ്യാപനം.

ഡെലവെയർ, വാഷിങ്ടണ്‍, നെബ്രാസ്ക സംസ്ഥാനങ്ങളിലെ ഗവർണർമാർ ഇന്ത്യാ ദിനം പ്രഖ്യാപിച്ച്‌ ഔദ്യോഗിക ഉത്തരവുകള്‍ പുറത്തിറക്കി. ഒഹായോ ഗവർണർ മൈക്ക് ഡിവൈനും ലെഫ്റ്റനന്റ് ഗവർണർ ജിം ട്രെസലും ഇന്ത്യയുടെ 80-ാം സ്വാതന്ത്ര്യദിനം സംയുക്തമായി ആഘോഷിക്കുന്ന ഫെഡറേഷൻ ഓഫ് ഇന്ത്യൻ അസോസിയേഷൻസ് ഒഹായോയെയും ന്യൂയോർക്കിലെ ഇന്ത്യൻ കോണ്‍സുലേറ്റ് ജനറലിനെയും അഭിനന്ദിച്ചു.

വാഷിങ്ടണ്‍ സംസ്ഥാനത്തെ സിയാറ്റില്‍, ബെല്‍വ്യൂ, കെന്റ്, സീടാക് തുടങ്ങിയ നഗരങ്ങളും ഇന്ത്യാ ദിനാചരണത്തിന്റെ ഭാഗമായി പ്രത്യേക പ്രഖ്യാപനങ്ങള്‍ നടത്തി. മെട്രോപൊളിറ്റൻ കിംഗ് കൗണ്ടി കൗണ്‍സിലും ഇന്ത്യാ ദിനത്തെ അംഗീകരിച്ചു.

ഇന്ത്യയുടെ ജനാധിപത്യ പാരമ്പര്യം, ഇന്ത്യയും അമേരിക്കയും തമ്മിലുള്ള പൊതുവായ മൂല്യങ്ങള്‍, വിവിധ മേഖലകളില്‍ ഇന്ത്യൻ-അമേരിക്കൻ സമൂഹം നല്‍കുന്ന സംഭാവനകള്‍ എന്നിവ പ്രഖ്യാപനങ്ങളില്‍ എടുത്തുപറഞ്ഞു. 

ബിസിനസ്, ശാസ്ത്രം, സാങ്കേതികവിദ്യ, വിദ്യാഭ്യാസം, ആരോഗ്യരംഗം, പൊതുസേവനം തുടങ്ങിയ മേഖലകളിലെ ഇന്ത്യൻ സമൂഹത്തിന്റെ പങ്കും നേതാക്കള്‍ പ്രശംസിച്ചു. വാഷിങ്ടണില്‍ നിന്നുള്ള യുഎസ് സെനറ്റർ മരിയ കാന്റ്‌വെല്‍ ഇന്ത്യൻ സമൂഹത്തിനും സിയാറ്റിലിലെ ഇന്ത്യൻ കോണ്‍സുലേറ്റ് ജനറലിനും സ്വാതന്ത്ര്യദിനാശംസകള്‍ നേർന്നു.

ഇന്ത്യയുടെ 80-ാം സ്വാതന്ത്ര്യദിനവും ഇന്ത്യ-അമേരിക്ക നയതന്ത്രബന്ധത്തിന്റെ 80-ാം വാർഷികവും ഒരേ വർഷം ആഘോഷിക്കുന്നത് പ്രത്യേക പ്രാധാന്യമുള്ളതാണെന്ന് കാന്റ്‌വെല്‍ പറഞ്ഞു. ലോകത്തിലെ ഏറ്റവും വലിയ രണ്ട് ജനാധിപത്യ രാജ്യങ്ങള്‍ തമ്മിലുള്ള ബന്ധം കഴിഞ്ഞ എട്ട് പതിറ്റാണ്ടിനിടെ കൂടുതല്‍ ശക്തമായെന്നും അവർ വ്യക്തമാക്കി. 

ഡെലവെയർ ഗവർണർ മാറ്റ് മെയർ ഓഗസ്റ്റ് 15 സംസ്ഥാനത്തുടനീളം 'ഇന്ത്യാ ദിനമായി' പ്രഖ്യാപിച്ചു. ഇന്ത്യൻ-അമേരിക്കൻ സമൂഹത്തിന്റെ സംസ്കാരവും പാരമ്പര്യവും സംസ്ഥാനത്തെ കൂടുതല്‍ സമ്പന്നമാക്കിയതായി അദ്ദേഹം പറഞ്ഞു പറഞ്ഞു.

വാഷിങ്ടണ്‍ ഗവർണർ ബോബ് ഫെർഗൂസനും ഇന്ത്യാ ദിനം പ്രഖ്യാപിച്ചു. സംരംഭകർ, അധ്യാപകർ, കലാകാരൻമാർ, പ്രൊഫഷണലുകള്‍ തുടങ്ങി വിവിധ മേഖലകളില്‍ പ്രവർത്തിക്കുന്ന ഇന്ത്യൻ-അമേരിക്കക്കാർ സംസ്ഥാനത്തിന്റെ സാംസ്കാരികവും സാമ്പത്തികവും സാമൂഹികവുമായ ജീവിതത്തെ സമ്പന്നമാക്കിയതായി അദ്ദേഹം പറഞ്ഞു. നെബ്രാസ്ക ഗവർണർ ജിം പില്ലനും സമാനമായ പ്രഖ്യാപനം നടത്തി. സംസ്ഥാനത്തിന്റെ സമ്പദ്‌വ്യവസ്ഥയിലും സാമൂഹിക ജീവിതത്തിലും സാംസ്കാരിക മേഖലയിലും ഇന്ത്യൻ-അമേരിക്കൻ സമൂഹം വഹിക്കുന്ന പങ്ക് അദ്ദേഹം ചൂണ്ടിക്കാട്ടി.

കിംഗ് കൗണ്ടിയില്‍ ഒരു ലക്ഷത്തിലധികം ഇന്ത്യൻ-അമേരിക്കക്കാർ താമസിക്കുന്നതായി കൗണ്ടി കൗണ്‍സില്‍ അറിയിച്ചു. വാഷിങ്ടണ്‍ സംസ്ഥാനത്ത് ഏകദേശം രണ്ട് ലക്ഷം ഇന്ത്യൻ സമൂഹാംഗങ്ങളുണ്ടെന്നും കൗണ്‍സില്‍ വ്യക്തമാക്കി. ഇന്ത്യ വിദ്യാഭ്യാസം, ആരോഗ്യരംഗം, സാമ്പത്തിക വികസനം തുടങ്ങിയ മേഖലകളില്‍ കൈവരിച്ച പുരോഗതിയെയും കൗണ്‍സില്‍ പ്രശംസിച്ചു.

സിയാറ്റില്‍ മേയർ കാറ്റി ബി. വില്‍സണ്‍ നഗരത്തില്‍ ഇന്ത്യാ ദിനം പ്രഖ്യാപിച്ചു. ബെല്‍വ്യൂ, കെന്റ്, സീടാക് നഗരങ്ങളിലെ മേയർമാരും ഇന്ത്യൻ-അമേരിക്കൻ സമൂഹത്തിന്റെ സാംസ്കാരിക, സാമൂഹിക, സാമ്പത്തിക സംഭാവനകളെ അംഗീകരിച്ച്‌ പ്രത്യേക പ്രഖ്യാപനങ്ങള്‍ നടത്തി.

മൊണ്ടാന ഗവർണർ ഗ്രെഗ് ജിയാൻഫോർട്ടെ വീഡിയോ സന്ദേശത്തിലൂടെ ഇന്ത്യൻ സമൂഹത്തിന് ആശംസകള്‍ നേർന്നു. സംസ്ഥാനത്തിന്റെ സാംസ്കാരിക, വിദ്യാഭ്യാസ, സാമ്പത്തിക മേഖലകളില്‍ ഇന്ത്യൻ-അമേരിക്കൻ സമൂഹം നല്‍കുന്ന സംഭാവനകളെ അദ്ദേഹം പ്രശംസിച്ചു.

സൗത്ത് ഡക്കോട്ട ഗവർണർ ലാറി റോഡനും സിയാറ്റിലിലെ ഇന്ത്യൻ കോണ്‍സുലേറ്റ് ജനറലിനും ആഘോഷങ്ങളില്‍ പങ്കെടുക്കുന്നവർക്കും ആശംസകള്‍ നേർന്നു. അലാസ്കയും ഇന്ത്യൻ, ഇന്ത്യൻ-അമേരിക്കൻ സമൂഹത്തിന്റെ സംഭാവനകള്‍ സംസ്ഥാനത്തെ കൂടുതല്‍ ശക്തിപ്പെടുത്തിയതായി ചൂണ്ടിക്കാട്ടി ഇന്ത്യാ ദിനാഘോഷങ്ങള്‍ക്ക് ആശംസകള്‍ അറിയിച്ചു.