ടെഹ്റാൻ: വാരങ്ങള് നീണ്ട സാങ്കേതിക ചർച്ചകള്ക്കൊടുവില് ഹോർമുസ് കടലിടുക്കിലെ പുതിയ കപ്പല് ഗതാഗത പാതയുടെ മേല് ഒമാനുമായി ധാരണയിലെത്തിയതായി ഇറാന്റെ വിദേശകാര്യ മന്ത്രാലയം ഔദ്യോഗിക വക്താവ് ഇസ്മായില് ബഖായി വ്യക്തമാക്കി.
ഇരു രാജ്യങ്ങളുടെയും പരമാധികാരം സംരക്ഷിച്ചുകൊണ്ട് തന്നെ കടലിടുക്കിലൂടെയുള്ള കപ്പലുകളുടെ സുരക്ഷിതമായ ഗതാഗതം ഉറപ്പാക്കാനാണ് ഇറാനും ഒമാനും തമ്മില് സ്വതന്ത്രമായ ഈ കരാറിലെത്തിയതെന്ന് ബഖായി ഊന്നിപ്പറഞ്ഞു. ചില വിഷയങ്ങളില് ചർച്ചകള് ഇനിയും തുടരുന്നുണ്ടെന്നും ഇരു രാജ്യങ്ങളും ചേർന്ന് ഉടൻ തന്നെ ഒരു സംയുക്ത പ്രസ്താവന പുറപ്പെടുവിക്കുമെന്നും അദ്ദേഹം പറഞ്ഞു.
തന്ത്രപ്രധാനമായ ഈ സമുദ്രപാതയില് സുരക്ഷിത നാവിഗേഷൻ റൂട്ടുകള് സ്ഥാപിക്കുന്നതിനായി ജൂണ് 18-ന് ഇരു രാജ്യങ്ങളും ഒപ്പുവെച്ച ധാരണാപത്രത്തിന് പിന്നാലെയാണ് തീരദേശ രാജ്യങ്ങളായ ഇറാന്റെയും ഒമാന്റെയും നേതൃത്വത്തില് തീവ്രമായ ചർച്ചകള് ആരംഭിച്ചത്. സമുദ്രപാതയുടെ ഭൂപടം സംബന്ധിച്ച നിർണ്ണായക വിവരങ്ങളില് ഇതിനോടകം തന്നെ ഇരുപക്ഷവും പൂർണ്ണ യോജിപ്പിലെത്തിയിട്ടുണ്ട്.
ഇവിടെ പോസ്റ്റു ചെയ്യുന്ന അഭിപ്രായങ്ങൾ (യു ക് മി) UCMI കമ്മ്യൂണിറ്റിയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.