ഒട്ടാവ : കാനഡയിലെ യു.എസ് അംബാസഡർ പീറ്റ് ഹൂക്സ്ട്രയെ രാജ്യത്തുനിന്ന് പുറത്താക്കണമെന്ന് ആവശ്യപ്പെട്ട് ഒരു ലക്ഷത്തിലേറെ കാനഡക്കാരാണ് കൗൺസിലിൽ ഹർജി ഒപ്പിട്ടിരിക്കുന്നത്.
വിവിധ യൂറോപ്യൻ, ലാറ്റിനമേരിക്കൻ രാജ്യങ്ങളിലും യു.എസ് അംബാസഡർമാർ ആധിഥേയ രാജ്യങ്ങളുമായി ഉരസലിലാണ്. ഫ്രാൻസിലെ യു.എസ് അംബാസഡർ ചാൾസ് കുഷ്നർ ഫ്രഞ്ച് സർക്കാരിന്റെ വിമർശനങ്ങൾ നേരിടുകയും നയതന്ത്ര കാര്യാലയത്തിന്റെ സമൻസുകൾ അവഗണിക്കുകയും ചെയ്തതിനെ തുടർന്ന് ഫ്രഞ്ച് ഉദ്യോഗസ്ഥരെ കാണുന്നതിൽ നിന്ന് അദ്ദേഹത്തിന് വിലക്കേർപ്പെടുത്തിയിട്ടുണ്ട്.
സമാനമായി പോളണ്ട്, ബെൽജിയം, ചിലി, ഐസ്ലാൻഡ് തുടങ്ങിയ രാജ്യങ്ങളിലും ട്രംപിന്റെ അംബാസഡർമാർ നടത്തിയ പ്രകോപനപരമായ പ്രസ്താവനകളും ഇടപെടലുകളും വലിയ നയതന്ത്ര പ്രതിസന്ധികളാണ് സൃഷ്ടിച്ചിരിക്കുന്നത്.
മറുഭാഗത്ത്, ലോകമെമ്പാടുമുള്ള പ്രധാന യു.എസ് നയതന്ത്ര തസ്തികകൾ നികത്താതെ ഒഴിഞ്ഞുകിടക്കുന്നതും വലിയ ആശങ്കയ്ക്ക് കാരണമാകുന്നുണ്ട്. നിലവിൽ പകുതിയോളം വിദേശ രാജ്യങ്ങളിൽ അമേരിക്കയ്ക്ക് ഔദ്യോഗിക അംബാസഡർമാരില്ല. ആഫ്രിക്കൻ ഭൂഖണ്ഡത്തിലെ 54 രാജ്യങ്ങളിൽ 13 ഇടങ്ങളിൽ മാത്രമാണ് യു.എസ് അംബാസഡർമാരുള്ളത്.
റഷ്യ, ഉക്രെയ്ൻ, സൗദി അറേബ്യ, യു.എ.ഇ തുടങ്ങിയ തന്ത്രപ്രധാന രാജ്യങ്ങളിലും തസ്തികകൾ ഒഴിഞ്ഞുകിടക്കുകയാണ്. പരിചയസമ്പന്നരായ കരിയർ നയതന്ത്രജ്ഞരെ മാറ്റിനിർത്തി ട്രംപിന്റെ വിശ്വസ്തർക്ക് മുൻഗണന നൽകുന്നതിനെതിരെ കടുത്ത വിമർശനമുയരുന്നുണ്ട്.
ഔദ്യോഗിക നയതന്ത്ര ചാനലുകളെ മറികടന്ന് ട്രംപിന്റെ അടുത്ത ബന്ധു ജാരെഡ് കുഷ്നർ, വ്യവസായി സ്റ്റീവ് വിറ്റ്കോഫ് എന്നിവരടങ്ങുന്ന ‘Special Envoys’ വഴി വിദേശകാര്യ ചർച്ചകൾ നടത്തുന്നതാണ് നിലവിലെ രീതി. വിദേശകാര്യ സെക്രട്ടറി മാർക്കോ റൂബിയോയെ പോലും ഒഴിവാക്കിക്കൊണ്ട് റഷ്യ, ഇസ്രായേൽ, ഹമാസ് എന്നിവരുമായുള്ള സുപ്രധാന ചർച്ചകൾ നിയന്ത്രിക്കുന്നത് ഈ സ്വകാര്യ വ്യക്തികളാണ്.
നയതന്ത്രജ്ഞരെ മുറിക്കുള്ളിൽ പോലും കയറ്റാതെ ഇത്തരം രഹസ്യ ചർച്ചകൾ നടത്തുന്നത് അമേരിക്കൻ വിദേശകാര്യ നയത്തിന്റെ സുതാര്യതയെ ബാധിക്കുന്നുവെന്നാണ് നയതന്ത്ര വിദഗ്ധർ ചൂണ്ടിക്കാണിക്കുന്നത്.
ഇവിടെ പോസ്റ്റു ചെയ്യുന്ന അഭിപ്രായങ്ങൾ (യു ക് മി) UCMI കമ്മ്യൂണിറ്റിയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.