വാഷിങ്ടണ്: അമേരിക്കയില് കോവിഡ്-19 കേസുകള് വീണ്ടും ഉയരുന്നു. വൈറസ് മറ്റൊരു കാലാനുസൃത തരംഗത്തിലേക്ക് കടന്നതോടെയാണ് വിവിധ സംസ്ഥാനങ്ങളില് രോഗബാധ വർദ്ധിക്കുന്നത്.
എന്നാല് മുൻകാല മഹാമാരി തരംഗങ്ങളെ അപേക്ഷിച്ച് ഇപ്പോഴത്തെ വർധന വളരെ കുറവാണെന്ന് വിദഗ്ധർ പറയുന്നു. അതേസമയം, പ്രായമായവർ, ശിശുക്കള്, പ്രതിരോധശേഷി കുറഞ്ഞവർ തുടങ്ങിയ വിഭാഗങ്ങളില് രോഗം ഗുരുതരമാകാനുള്ള സാധ്യത ഇപ്പോഴും കൂടുതലാണ്.
ഹാർവാർഡ് ബെല്ഫർ സെന്ററിലെ ഇൻഫെക്ഷ്യസ് ഡിസീസ് എപ്പിഡെമിയോളജിസ്റ്റ് ഡോ. സൈറ മദദ് പറയുന്നത്, രാജ്യത്തുടനീളം കോവിഡ് വ്യാപനം ഉയരുന്നുണ്ടെങ്കിലും വളരെ താഴ്ന്ന നിലയില് നിന്നാണ് ഇപ്പോഴത്തെ വർധന. ജൂലൈയില് തെക്കൻ, പടിഞ്ഞാറൻ മേഖലകളിലെ ചില സംസ്ഥാനങ്ങളില് കേസുകള് ഉയരാൻ തുടങ്ങിയെന്നും ജൂലൈ അവസാനത്തോടെയും ഓഗസ്റ്റ് ആദ്യത്തോടെയും ഇത് കൂടുതല് പ്രദേശങ്ങളിലേക്ക് വ്യാപിച്ചെന്നും അവർ പറഞ്ഞു.
മലിനജലത്തില് വൈറസിന്റെ സാന്നിധ്യം പരിശോധിക്കുന്ന സംവിധാനത്തിലും കോവിഡ് വ്യാപനം ഉയരുന്നതായി കണ്ടെത്തി. സ്റ്റാൻഫോർഡ് സർവകലാശാലയുടെ നേതൃത്വത്തിലുള്ള WastewaterSCAN പദ്ധതിയുടെ കണക്കുകള് പ്രകാരം ജൂലൈയെ അപേക്ഷിച്ച് ഓഗസ്റ്റില് മലിനജലത്തിലെ കൊറോണ വൈറസ് സാന്നിധ്യം 105 ശതമാനം വർധിച്ചു.
ഹവായി, മിസിസിപ്പി സംസ്ഥാനങ്ങളില് വൈറസ് സാന്നിധ്യം വർധിച്ചതായി പരിശോധനയില് കണ്ടെത്തി. കാലിഫോർണിയ, ഫ്ലോറിഡ, ടെക്സസ്, വാഷിങ്ടണ് എന്നിവിടങ്ങളിലും രാജ്യത്തിന്റെ മറ്റ് പല ഭാഗങ്ങളേക്കാള് ഉയർന്ന വൈറസ് സാന്നിധ്യമാണ് രേഖപ്പെടുത്തിയത്.
വേനലിലും ശൈത്യകാലത്തും കോവിഡ് തരംഗം
ഇൻഫ്ലുവൻസ, RSV എന്നിവയില് നിന്ന് വ്യത്യസ്തമായി കോവിഡ്-19ന് ഒരു പ്രത്യേക വാർഷിക സീസണ് മാത്രമില്ല. നിലവില് വേനല്ക്കാലത്തും ശൈത്യകാലത്തുമായി രണ്ട് പ്രധാന തരംഗങ്ങളാണ് സാധാരണയായി കാണപ്പെടുന്നതെന്ന് വിദഗ്ധർ പറയുന്നു. വേനല്ക്കാലത്ത് ആളുകള് എയർ കണ്ടീഷൻ ചെയ്ത അടച്ചിട്ട ഇടങ്ങളില് കൂടുതല് സമയം ചെലവഴിക്കുന്നതാണ് വ്യാപനം കൂടാനുള്ള ഒരു കാരണം. വായുസഞ്ചാരം കുറവുള്ള ഇത്തരം ഇടങ്ങളില് വൈറസ് വേഗത്തില് പടരാം.
വേനല്ക്കാലത്തിന്റെ അവസാനത്തോടെ സാമൂഹിക ഒത്തുചേരലുകള് വർധിക്കുന്നതും കുട്ടികള് സ്കൂളുകളില് തിരിച്ചെത്തുന്നതും വൈറസ് വ്യാപനത്തിന് കൂടുതല് അവസരമൊരുക്കുന്നു. ജൂലൈ ആദ്യമോ മധ്യമോ ആകുമ്പോള് കോവിഡ് കേസുകള് ഉയരാൻ തുടങ്ങുകയും പിന്നീട് വേഗത്തില് വർധിക്കുകയും ചെയ്യുന്ന രീതിയാണ് കഴിഞ്ഞ ഏതാനും വർഷങ്ങളായി കാണുന്നതെന്ന് ഇൻവിവൈഡ് കമ്പനിയുടെ ചീഫ് മെഡിക്കല് ഓഫീസർ ഡോ. മൈക്കല് മിന പറഞ്ഞു.
പുതിയ വകഭേദങ്ങളും കാരണമാകുന്നു
പുതിയ കോവിഡ് വകഭേദങ്ങള്ക്ക് മുൻപ് രോഗബാധയിലൂടെയോ വാക്സിനേഷനിലൂടെയോ ലഭിച്ച പ്രതിരോധശേഷിയെ ഭാഗികമായി മറികടക്കാൻ കഴിയുന്നതും രോഗബാധ വീണ്ടും ഉയരാൻ കാരണമാകുന്നു. കാലക്രമേണ വൈറസില് ജനിതക മാറ്റങ്ങള് ഉണ്ടാകുന്നതും ആവർത്തിച്ചുള്ള രോഗബാധയ്ക്ക് കാരണമാകുന്നതായി സ്റ്റോണി ബ്രൂക്ക് ചില്ഡ്രൻസ് ഹോസ്പിറ്റലിലെ ശിശുരോഗ വിദഗ്ധൻ ഡോ. ആൻഡ്രൂ ഹാൻഡല് പറഞ്ഞു.
കോവിഡ് കേസുകള് ഉയരുന്നുണ്ടെങ്കിലും ഇപ്പോഴത്തെ സാഹചര്യം മുൻകാലത്തെ വലിയ മഹാമാരി തരംഗങ്ങള്ക്ക് സമാനമല്ലെന്നാണ് ആരോഗ്യവിദഗ്ധരുടെ വിലയിരുത്തല്. കോവിഡ് മൂലമുള്ള ആശുപത്രി പ്രവേശനവും അടിയന്തര ചികിത്സ തേടുന്നവരുടെ എണ്ണവും ഇപ്പോഴും താഴ്ന്ന നിലയിലാണ്.
നിലവിലെ വർധനയെ "വേനല്ക്കാല തരംഗം" എന്നാണ് ഡോ. സൈറ മദദ് വിശേഷിപ്പിച്ചത്. അതേസമയം, പ്രായമായവർ, ശിശുക്കള്, പ്രതിരോധശേഷി കുറഞ്ഞവർ എന്നിവർ കൂടുതല് ജാഗ്രത പാലിക്കണമെന്ന് ആരോഗ്യവിദഗ്ധർ മുന്നറിയിപ്പ് നല്കി
ഇവിടെ പോസ്റ്റു ചെയ്യുന്ന അഭിപ്രായങ്ങൾ (യു ക് മി) UCMI കമ്മ്യൂണിറ്റിയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.