മനുഷത്വം മരവിച്ച മനുഷ്യർ: മൃതദേഹത്തില്‍നിന്ന് ആഭരണം മോഷ്ടിച്ചു, പ്രളയത്തില്‍ ഒലിച്ചെത്തിയ സേഫില്‍നിന്ന് പണം കവര്‍ന്നു അറസ്റ്റ്,

കാഠ്മണ്ഡു: പ്രളയത്തില്‍ ഒലിച്ചുവന്ന ബാങ്ക് സേഫ് തുറന്ന് പണം അപഹരിച്ച 29 പേരെ നേപ്പാളി പോലീസ് അറസ്റ്റ് ചെയ്തു. ത്രിശൂലി നദിയിലൂടെയാണ് സേഫ് ഒഴുകിവന്നത്. ബോതെകോശിയിലെ റസൂവയിലും പിന്നീട് ഗാല്‍ച്ചിയിലും സേഫ് ഒഴുകിയെത്തിയെന്നാണ് റിപ്പോർട്ട്.

പ്രദേശവാസികള്‍ സേഫ് തുറന്ന് പണമെടുത്തതായി പോലീസിന് റിപ്പോർട്ട് ലഭിക്കുകയായിരുന്നു. ഉടൻതന്നെ സ്ഥലത്തെത്തിയ പോലീസ് 29 പേരെ അറസ്റ്റ് ചെയ്തു. 92.68 ലക്ഷം നേപ്പാളി രൂപ ഇവരില്‍നിന്ന് കണ്ടെടുത്തു. സേഫ് വന്നത് എവിടെനിന്നാണെന്നു കണ്ടെത്താനായിട്ടില്ല. കൂടുതല്‍ പേർ പണം എടുത്തിരിക്കാം എന്ന നിഗമനത്തില്‍ അന്വേഷണം വ്യാപിപ്പിച്ചിട്ടുണ്ട്.

മറ്റൊരു സംഭവത്തില്‍ പ്രളയത്തില്‍ മരിച്ച സ്ത്രീയുടെ കാതുകളില്‍നിന്ന് സ്വർണ കമ്മല്‍ അപഹരിച്ച രണ്ടു പേർ അറസ്റ്റിലായി. നാരാണി നദിയിലൂടെ ഒഴുകിയെത്തിയ മൃതദേഹത്തില്‍നിന്ന് ആഭരണം മോഷ്ടിക്കുന്നതിന്റെ വീഡിയോ വൈറലായ പശ്ചാത്തലത്തിലാണ് അറസ്റ്റ്.