ഡബ്ലിനിൽ സ്ത്രീകൾക്ക് നേരെ അതിക്രമം നടത്തുകയും ഭയപ്പെടുത്തുന്ന രീതിയിൽ പെരുമാറുകയും കേസ്: ഇന്ത്യൻ വിദ്യാർത്ഥിക്ക് തടവുശിക്ഷ, നാടുകടത്തൽ നടപടി

ഡബ്ലിൻ — അയർലൻഡിലെ ഡബ്ലിനിൽ വഴിപോക്കരായ സ്ത്രീകൾക്ക് നേരെ ലൈംഗിക അതിക്രമം നടത്തുകയും ഭയപ്പെടുത്തുന്ന രീതിയിൽ പെരുമാറുകയും ചെയ്ത കേസിൽ ഇന്ത്യൻ സ്വദേശിയായ വിദ്യാർത്ഥിക്ക് കോടതി നാല് മാസത്തെ തടവുശിക്ഷ വിധിച്ചു. 

യൂണിവേഴ്‌സിറ്റി കോളേജ് ഡബ്ലിൻ (UCD) സ്മർഫിറ്റ് ബിസിനസ് സ്‌കൂളിൽ ഉപരിപഠനത്തിനായെത്തിയതായിരുന്നു പ്രതി. പഞ്ചാബ് സ്വദേശിയായ റിഷഭ് മഹാജനെയാണ് (31) ഡബ്ലിൻ സർക്യൂട്ട് ക്രിമിനൽ കോടതി ശിക്ഷിച്ചത്.

കേസിന്റെ വിശദാംശങ്ങൾ

• കേസ്: 2024 ഒക്ടോബർ – നവംബർ: ഗ്ലാസ് ഭിത്തിയുള്ള കെട്ടിടത്തിനുള്ളിൽ രാത്രി വൈകി ജോലി ചെയ്യുകയായിരുന്ന യുവതിയെ നോക്കി മൂന്ന് വ്യത്യസ്ത ദിവസങ്ങളിലായി ഇയാൾ അശ്ലീല പ്രദർശനം നടത്തി. യുവതി മാറിപ്പോകാൻ പറഞ്ഞപ്പോൾ പരിഹസിച്ച് ചിരിക്കുകയും, അവസാനത്തെ തവണ ഗ്ലാസിൽ കൈ തുടച്ച് ഓടിപ്പോകുകയും ചെയ്തു. സിസിടിവി (CCTV) ദൃശ്യങ്ങളിൽ ഇത് വ്യക്തമായിരുന്നു. 2024 ഡിസംബർ 15: UCD-യിലെ പഠനമുറിയിൽ പഠിച്ചുകൊണ്ടിരുന്ന യുവതിക്ക് മുന്നിൽ ഇരുന്ന് ഇയാൾ അശ്ലീല പ്രദർശനം നടത്തുകയും സ്വയംഭോഗം ചെയ്യുകയും ചെയ്തു. 2025 മാർച്ച് 5: UCD ക്യാമ്പസിൽ വെച്ച് കാറിലേക്ക് നടന്നുപോകുകയായിരുന്ന യുവതിക്ക് നേരെ ട്രൗസർ താഴെയിട്ട് അശ്ലീല പ്രവൃത്തി ചെയ്തു. യുവതി ബഹളം വെച്ചതോടെ ഇയാൾ ഓടി രക്ഷപ്പെടാൻ ശ്രമിച്ചെങ്കിലും ക്യാമ്പസ് സെക്യൂരിറ്റി ഇയാളെ പിടിച്ച് പോലീസിന് കൈമാറുകയായിരുന്നു. 2024 ഡിസംബർ 26: അപ്പാർട്ട്‌മെന്റ് കാണാൻ എത്തിയ ഇയാൾ, തൊട്ടടുത്ത വീടിന്റെ ജനലിലൂടെ യുവതിയുടെ കിടപ്പുമുറിയിലേക്ക് നോക്കി അശ്ലീല രീതിയിൽ പെരുമാറി.
• കുറ്റസമ്മതം: പൊതുസ്ഥലത്ത് സ്ത്രീകൾക്ക് നേരെ ലൈംഗിക അതിക്രമം നടത്തിയതടക്കം ചാർജ് ചെയ്ത നാല് കുറ്റങ്ങളിൽ പ്രതി കോടതിയിൽ കുറ്റസമ്മതം നടത്തി.
• ശിക്ഷാ വിധി: കോടതി ഇയാൾക്ക് ആകെ 16 മാസത്തെ തടവുശിക്ഷയാണ് വിധിച്ചത്. എന്നാൽ കർശന വ്യവസ്ഥകളോടെ ഇതിൽ 12 മാസത്തെ ശിക്ഷ സസ്പെൻഡ് ചെയ്തതിനെ തുടർന്ന് ഇയാൾ 4 മാസത്തെ തടവുശിക്ഷ അനുഭവിക്കണം.
• നാടുകടത്തൽ നടപടി: ശിക്ഷാ കാലാവധി പൂർത്തിയാകുന്നതോടെ പ്രതിയെ അയർലൻഡിൽ നിന്ന് ഇന്ത്യയിലേക്ക് നാടുകടത്താൻ (Deportation) ജസ്റ്റിസ് ഡിപ്പാർട്ട്‌മെന്റ് നടപടികൾ സ്വീകരിക്കും. കൂടാതെ ഇയാളെ സെക്‌സ് ഓഫൻഡേഴ്‌സ് രജിസ്റ്ററിലും ഉൾപ്പെടുത്തിയിട്ടുണ്ട്.

നഗരത്തിലെ വിവിധ ഭാഗങ്ങളിൽ വെച്ച് തനിക്ക് നേരിടേണ്ടി വന്ന അനുഭവത്തെക്കുറിച്ച് ആക്രമണത്തിനിരയായ സ്ത്രീകൾ കോടതിയിൽ മൊഴി നൽകിയിരുന്നു. പ്രതിയുടെ ഭാഗത്തുനിന്നുണ്ടായ അപ്രതീക്ഷിത ആക്രമണം വലിയ മാനസിക ആഘാതമുണ്ടാക്കിയതായി ഇവർ വ്യക്തമാക്കി.