; നവംബറിലെ മിഡ്‌ടേം തിരഞ്ഞെടുപ്പ് നിർണായകം:ഒമ്പത് ജുഡീഷ്യൽ നോമിനികളെ പ്രഖ്യാപിച്ച് ട്രംപ്,

വാഷിങ്ടൺ: നവംബർ 3-ന് നടക്കുന്ന മിഡ്‌ടേം തിരഞ്ഞെടുപ്പ് അടുത്തിരിക്കെ, ഒമ്പത് പുതിയ ജുഡീഷ്യൽ നോമിനികളെ പ്രഖ്യാപിച്ച് യു.എസ്. പ്രസിഡന്റ് ഡൊണാൾഡ് ട്രംപ്.

ഒക്ലഹോമ, അലാസ്ക, ടെക്സസ്, കെന്റക്കി, ലൂസിയാന, ഫ്ലോറിഡ എന്നീ റിപ്പബ്ലിക്കൻ നിയന്ത്രണത്തിലുള്ള സംസ്ഥാനങ്ങളിലെ ജില്ലാ കോടതി ജഡ്ജി സ്ഥാനങ്ങളിലേക്കാണ് ഈ നാമനിർദേശം. സെനറ്റ് അംഗീകാരം നൽകിയാൽ ഇവർക്ക് ആജീവനാന്ത ജില്ലാ കോടതി ജഡ്ജിമാരായി ചുമതലയേൽക്കാം.

ചൊവ്വാഴ്ച രാത്രി ട്രൂത്ത് സോഷ്യലിലൂടെയാണ് ട്രംപ് നോമിനികളുടെ പേരുകൾ പ്രഖ്യാപിച്ചത്. സെനറ്റിന്റെ നിലവിലെ സമയക്രമം അനുസരിച്ച് നവംബർ 3-ലെ തിരഞ്ഞെടുപ്പിന് മുമ്പ് പൂർണ സെനറ്റ് വോട്ടെടുപ്പിലൂടെ ഇവരുടെ നിയമനം നടക്കാൻ സാധ്യത കുറവാണ്. അതിനാൽ, തിരഞ്ഞെടുപ്പിന് ശേഷം നടക്കുന്ന ‘ലേം ഡക്ക്’ കാലയളവിലായിരിക്കും സ്ഥിരീകരണ വോട്ടെടുപ്പ് നടക്കാൻ ഇടയുള്ളത്. ഈ മിഡ്‌ടേം തിരഞ്ഞെടുപ്പിലൂടെ സെനറ്റിന്റെ നിയന്ത്രണം തിരിച്ചുപിടിക്കാനാകുമെന്ന പ്രതീക്ഷയിലാണ് ഡെമോക്രാറ്റുകൾ.

ഒക്ലഹോമയിലെ നോർതേൺ ഡിസ്ട്രിക്ട് കോടതിയിലേക്ക് നാമനിർദേശം ചെയ്യപ്പെട്ട സാക് വെസ്റ്റിന്റെ പേര് ചില യാഥാസ്ഥിതിക നിയമപ്രവർത്തകർ ഓൺലൈനിൽ സ്വാഗതം ചെയ്തു. ഒക്ലഹോമ അറ്റോർണി ജനറൽ ഓഫീസിൽ സോളിസിറ്റർ ജനറലായും സ്പെഷ്യൽ ലിറ്റിഗേഷൻ ഡയറക്ടറായും പ്രവർത്തിച്ചിട്ടുള്ള വെസ്റ്റിനെ, ഭരണഘടനയ്ക്കും മതസ്വാതന്ത്ര്യത്തിനും വേണ്ടി വാദിച്ച അഭിഭാഷകനെന്നാണ് ട്രംപ് വിശേഷിപ്പിച്ചത്. 

മതാധിഷ്ഠിത ചാർട്ടർ സ്കൂളുകൾക്ക് അനുകൂലമായി നിലപാടെടുത്ത വെസ്റ്റിന്റെ നീക്കങ്ങൾ വിവാദമായെങ്കിലും 2025 മേയിൽ യു.എസ്. സുപ്രീം കോടതി ഇത് തടഞ്ഞിരുന്നു.അലാസ്കയിൽ രണ്ട് വർഷമായി ഒഴിഞ്ഞുകിടക്കുന്ന ജുഡീഷ്യൽ സീറ്റിലേക്ക് യു.എസ്. മജിസ്ട്രേറ്റ് ജഡ്ജി കൈൽ റിയർഡണെ ഉയർത്താനാണ് ട്രംപിന്റെ നിർദേശം. മുൻ യു.എസ്. ഡിസ്ട്രിക്ട് ജഡ്ജി ജോഷ്വ കിൻഡ്രഡ് 2024-ൽ രാജിവച്ചതിനെ തുടർന്നാണ് ഈ സീറ്റ് ഒഴിവുവന്നത്. 

കോടതി ജീവനക്കാർക്ക് ശത്രുതാപരമായ തൊഴിൽ അന്തരീക്ഷം സൃഷ്ടിക്കുകയും ഒരു നിയമസഹായിയുമായി അനുചിതമായ ബന്ധം പുലർത്തുകയും ചെയ്തതായി അന്വേഷണത്തിൽ കണ്ടെത്തിയതിനെ തുടർന്നായിരുന്നു കിൻഡ്രഡിന്റെ രാജി.

മറ്റ് പ്രധാന നാമനിർദേശങ്ങളിൽ, ഒക്ലഹോമയിലെ ഈസ്റ്റേൺ ഡിസ്ട്രിക്റ്റിലേക്ക് ട്രെവർ പെംബർട്ടണെയും, ടെക്സസിലെ നോർതേൺ ഡിസ്ട്രിക്റ്റിലേക്ക് കോർട്ട്നി കോക്കറിനെയും, സതേൺ ഡിസ്ട്രിക്റ്റിലേക്ക് റിച്ചാർഡ് ബെന്നറ്റിനെയും ഉൾപ്പെടുത്തിയിട്ടുണ്ട്. കൂടാതെ ലൂസിയാനയിലേക്ക് ബ്രാഡ് കെല്ലി, പീറ്റർ മാൻസ്ഫീൽഡ് എന്നിവരെയും കെന്റക്കിയിലേക്ക് ഡാനിയൽ ബാലു, ഫ്ലോറിഡയിലേക്ക് റോബർട്ട് ലോംഗ് എന്നിവരെയുമാണ് ട്രംപ് നിർദേശിച്ചിരിക്കുന്നത്.