പ്രതിസന്ധികളെ അതിജീവിച്ച് പഠിച്ചുയർന്ന ചൈതന്യയും വരൻ അഖിലും അയർലന്റിൽ, വിവാഹം ഓഗസ്റ്റ് 31 തിങ്കളാഴ്ച

പത്തനാപുരം: മാതാപിതാക്കളുടെ തണലില്ലാതെ ഗാന്ധിഭവന്റെ സ്നേഹവാത്സല്യങ്ങളിൽ വളർന്ന് വലിയ നിലയിലെത്തിയ ചൈതന്യയുടെ വിവാഹനിശ്ചയ വാർത്തകൾക്ക് പിന്നാലെ, ഇപ്പോൾ ഔദ്യോഗിക വിവാഹക്ഷണക്കത്ത് ഗാന്ധിഭവൻ പുറത്തുവിട്ടു. ഗാന്ധിഭവന്റെ ഔദ്യോഗിക സോഷ്യൽ മീഡിയ പേജുകളിലൂടെയാണ് ഈ സന്തോഷവാർത്ത പങ്കുവെച്ചിരിക്കുന്നത്.

ഗാന്ധിഭവന്റെ മകളായ ചൈതന്യയ്ക്ക് തിങ്കളാഴ്ച താലികെട്ടാണ്. അയര്‍ലണ്ടില്‍ നഴ്‌സ് ആയ ചൈതന്യയും പ്രതിശ്രുത വരനായ അഖിലും വിവാഹ ഒരുക്കങ്ങള്‍ക്കായി നാട്ടില്‍ എത്തിക്കഴിഞ്ഞു. ഗാന്ധിഭവന്റെ മകളുടെ വിവാഹക്കാര്യം സ്വന്തം മാതാപിതാക്കളെ പോലെ തന്നെ ഏറ്റെടുത്തു നടത്തുന്ന കാര്യം ഗാന്ധിഭവന്‍ നടത്തിപ്പില്‍ മുഖ്യ പങ്കാളിത്തമുള്ള പുനലൂര്‍ സോമനും പത്‌നി പ്രസന്ന സോമരാജനും ചേര്‍ന്നാണ് നാട്ടുകാരെ അറിയിച്ചിരിക്കുന്നത്. സോഷ്യല്‍ മീഡിയ വഴി എത്തിയ ക്ഷണക്കത്ത് കണ്ടു ഒട്ടേറെ ആളുകളാണ് ചൈതന്യയ്ക്ക് ആശംസകള്‍ നേരാന്‍ എത്തികൊണ്ടിരിക്കുന്നത്. 

തിരുവനന്തപുരം പാറശ്ശാല ആടുമെൻകാട് കമൽ നിവാസിൽ കമാലസനൻ - സരസ്വതി ദമ്പതികളുടെ മകൻ അഖിൽ എസ്. കമൽ ആണ് ചൈതന്യയുടെ ജീവിതപങ്കാളിയാകുന്നത്. പ്രതിസന്ധികളെ അതിജീവിച്ച് പഠിച്ചുയർന്ന ചൈതന്യയും വരൻ അഖിലും ഇപ്പോൾ അയർലന്റിൽ സ്റ്റാഫ് നഴ്സ്മാരായി ജോലി ചെയ്യുകയാണ്.

വിവാഹ വിവരങ്ങൾ:

• തീയതി: 2026 ഓഗസ്റ്റ് 31, തിങ്കളാഴ്ച
• സമയം: പകൽ 11:00 മണിക്ക്
• വേദി: പത്തനാപുരം ഗാന്ധിഭവൻ

ഗാന്ധിഭവൻ എന്ന വലിയ തണലിൽ നിന്നും സ്വന്തം കാലിൽ നിൽക്കാൻ പ്രാപ്തയായ മകളുടെ ജീവിതത്തിലെ ഈ സുപ്രധാന മുഹൂർത്തത്തിന് സാക്ഷിയാകാനും, ആശീർവദിക്കാനും എല്ലാ പ്രിയപ്പെട്ടവരുടെയും സാന്നിധ്യവും പ്രാർത്ഥനയും ഉണ്ടാകണമെന്ന് ഗാന്ധിഭവൻ കുടുംബാംഗങ്ങൾ അറിയിച്ചു. വിവാഹത്തോടനുബന്ധിച്ചുള്ള വിപുലമായ ഒരുക്കങ്ങളാണ് പത്തനാപുരത്ത് പുരോഗമിക്കുന്നത്.

പ്രിയപ്പെട്ട ബന്ധുമിത്രാദികളെ,

ഞങ്ങളുടെ മകള്‍ ചൈതന്യയുടെ വിവാഹം 2026 ഓഗസ്റ്റ് 31 തിങ്കളാഴ്ച പകല്‍ 11 മണിക്ക് പത്തനാപുരം ഗാന്ധിഭവനില്‍ വെച്ച് നടക്കുകയാണ്. തിരുവനന്തപുരം പാറശ്ശാല ആടുമെന്‍കാട്, കമല്‍ നിവാസ് കമാലസനന്‍ - സരസ്വതി ദമ്പതികളുടെ മകന്‍ അഖില്‍ എസ്. കമല്‍ ആണ് വരന്‍

വരനും വധുവും ഇപ്പോള്‍ അയര്‍ലന്റില്‍ സ്റ്റാഫ് നഴ്‌സായി സേവനം ചെയ്യുകയാണ്.

വര്‍ഷങ്ങള്‍ക്കുമുന്‍പ് മാതാപിതാക്കള്‍ മരണപ്പെട്ടതിനെ തുടര്‍ന്ന് സ്വന്തമായി ഒന്നും ഇല്ലാതായിത്തീര്‍ന്ന മൂന്നു പെണ്‍കുട്ടികള്‍ ഗാന്ധിഭവനില്‍ എത്തി. അവര്‍ ഇവിടെ മക്കളായി വളര്‍ന്നു. ജനറല്‍ നഴ്‌സിംഗ് കഴിഞ്ഞ മൂത്തയാളിനെ കോട്ടയത്ത് ക്ഷേത്രം ശാന്തിയായ യുവാവ് വിവാഹം കഴിച്ചു. രണ്ടാമത്തെയാള്‍ സ്‌പെഷ്യല്‍ സ്‌കൂള്‍ടീച്ചര്‍ ട്രയിനിംഗ് കഴിഞ്ഞ് ടീച്ചറാണ്. തിരുവനന്തപുരത്ത് വിവാഹജീവിതം നയിക്കുന്നു. മൂന്നാമത്തെയാളായ ചൈതന്യ ബി.എസ്.സി നഴ്സിംഗും ഉപരിപഠന ങ്ങളും കഴിഞ്ഞ് ഒന്നരവര്‍ഷമായി അയര്‍ലന്റില്‍ നഴ്‌സാണ്.

ഇരുവരുടെയും മുന്‍കൂട്ടി തീരുമാനിച്ച വിവാഹം ലീവ് കിട്ടിയതനുസരിച്ച് തീയതി പെട്ടെന്ന് തീരുമാനിക്കുകയായിരുന്നു. അതുകൊണ്ട് പ്രത്യേകമായ ക്ഷണക്കത്തുകള്‍ ഇല്ല. സോഷ്യല്‍ മീഡിയയിലൂടെയുള്ള ഈ ക്ഷണം സ്വീകരിച്ച് വിവാഹത്തില്‍ പങ്കെടുക്കുവാനും ആശംസകള്‍ നേരുവാനും എല്ലാവരെയും വിനയപൂര്‍വ്വം ക്ഷണിക്കുന്നു.

മാതാപിതാക്കളുടെ തണലില്ലാതെ ഗാന്ധിഭവനിൽ വളർന്ന്, പഠിച്ച്, സ്വന്തം കാലിൽ നില്ക്കാൻ പ്രാപ്തയായ ഞങ്ങളുടെ മകൾ ഒരു പുതിയ ജീവിതത്തിലേക്ക് പ്രവേശിക്കുന്ന ഈ ധന്യമുഹൂർത്തത്തിൽ പ്രിയപ്പെട്ട ഏവരുടെയും മഹനീയ സാന്നിധ്യവും പ്രാർത്ഥനയും അനുഗ്രഹങ്ങളും ഉണ്ടാകണമെന്ന് വിനയപൂർവ്വം അപേക്ഷിക്കുന്നു.

വിശ്വസ്തതയോടെ,ഗാന്ധിഭവൻ കുടുംബാംഗങ്ങൾ(പത്തനാപുരം)