വിദേശത്തുനിന്ന് അയർലണ്ടിലേക്ക് ഭക്ഷണസാധനങ്ങൾ കൊണ്ടുവരുന്നവർ ശ്രദ്ധിക്കുക; കസ്റ്റംസ് നിയമങ്ങൾ കർശനമാക്കി ഫുഡ് സേഫ്റ്റി അതോറിറ്റി

ഡബ്ലിൻ: വിദേശരാജ്യങ്ങളിൽ നിന്നും അയർലണ്ടിലേക്ക് യാത്ര ചെയ്യുന്നവർ തങ്ങളുടെ ലഗേജുകളിൽ വ്യക്തിഗത ആവശ്യത്തിനായി ഭക്ഷണസാധനങ്ങൾ കരുതുമ്പോൾ കസ്റ്റംസ് നിയമങ്ങൾ കർശനമായി പാലിക്കണമെന്ന് ഫുഡ് സേഫ്റ്റി അതോറിറ്റി ഓഫ് അയർലണ്ട് (FSAI) ഓർമ്മിപ്പിച്ചു. 

യൂറോപ്യൻ യൂണിയന് പുറത്തുള്ള രാജ്യങ്ങളിൽ നിന്നും (യുകെ ഉൾപ്പെടെ) വരുന്ന യാത്രക്കാർ കൊണ്ടുവരുന്ന ഭക്ഷ്യവസ്തുക്കളുടെ ഭാരത്തിനും ഇനങ്ങൾക്കും കൃത്യമായ നിയന്ത്രണങ്ങൾ ഏർപ്പെടുത്തിയിട്ടുണ്ട്.

രോഗവ്യാപന സാധ്യത കണക്കിലെടുത്ത് വിദേശത്തുനിന്നും വ്യക്തിഗത ആവശ്യങ്ങൾക്കായി ഇറച്ചി, പാൽ, മറ്റ് പാൽ ഉൽപ്പന്നങ്ങൾ എന്നിവ അയർലണ്ടിലേക്ക് കൊണ്ടുവരുന്നത് പൂർണ്ണമായും നിരോധിച്ചിരിക്കുകയാണ്. എന്നാൽ മറ്റ് ചില മൃഗ ഉൽപ്പന്നങ്ങൾക്ക് നിബന്ധനകളോടെ ഇളവുകളുണ്ട്. കൊഞ്ച്, ലോബ്‌സ്റ്റർ, കുടൽമാറ്റിയ മീൻ തുടങ്ങിയ മത്സ്യവിഭവങ്ങൾ പരമാവധി 20 കിലോഗ്രാം വരെയോ അല്ലെങ്കിൽ ഒരു വലിയ മീനിന്റെ ഭാരം വരെയോ ലഗേജിൽ അനുവദിക്കും. തേൻ, ജീവനുള്ള കക്കകൾ എന്നിവ പരമാവധി 2 കിലോഗ്രാം വരെ മാത്രമേ കൊണ്ടുവരാൻ പാടുള്ളൂ. കുഞ്ഞുങ്ങൾക്കുള്ള പാൽപ്പൊടി, പ്രത്യേക മെഡിക്കൽ ഭക്ഷണങ്ങൾ എന്നിവയും 2 കിലോഗ്രാം വരെ അനുവദിക്കുമെങ്കിലും, ഇവ പൊട്ടിക്കാത്തതും ഫ്രിഡ്ജിൽ സൂക്ഷിക്കേണ്ടതില്ലാത്തതുമായ ബ്രാൻഡഡ് ഉൽപ്പന്നങ്ങൾ ആയിരിക്കണം. ഇവ പോസ്റ്റൽ വഴി അയക്കാൻ പാടുള്ളതല്ല.

അതേസമയം പച്ചക്കറികൾ, പഴങ്ങൾ, ധാന്യങ്ങൾ, ചായപ്പൊടി, സുഗന്ധവ്യഞ്ജനങ്ങൾ തുടങ്ങിയ മൃഗങ്ങളിൽ നിന്നല്ലാത്ത ഭക്ഷ്യവിഭവങ്ങൾക്ക് പൊതുവെ വലിയ നിയന്ത്രണങ്ങളില്ല. എങ്കിലും യൂറോപ്യൻ യൂണിയന്റെ പ്രത്യേക നിരീക്ഷണ പട്ടികയിലുള്ള ഉയർന്ന അപകടസാധ്യതയുള്ള സസ്യ ഉൽപ്പന്നങ്ങൾ ആണെങ്കിൽ ഫ്രഷ് ഇനങ്ങൾക്ക് 5 കിലോഗ്രാം വരെയും ഉണക്കിയവയ്ക്ക് 2 കിലോഗ്രാം വരെയും ഭാരപരിധി നിശ്ചയിച്ചിട്ടുണ്ട്. ഈ പട്ടികയിൽ ഇല്ലാത്ത ഇതര സസ്യവിഭവങ്ങൾ യാതൊരു ഭാരപരിധിയുമില്ലാതെ കൊണ്ടുവരാവുന്നതാണ്.

ലഗേജിൽ കൊണ്ടുവരുന്ന ഭക്ഷണസാധനങ്ങൾ പൂർണ്ണമായും സ്വന്തം ആവശ്യത്തിനോ സമ്മാനമായി നൽകാനോ ഉള്ളതായിരിക്കണമെന്നും വാണിജ്യ ആവശ്യങ്ങൾക്ക് ഉപയോഗിക്കരുതെന്നും അധികൃതർ വ്യക്തമാക്കി. അനുവദനീയമായ പരിധിയിൽ കൂടുതൽ ഭക്ഷ്യവസ്തുക്കൾ കൈവശം വെക്കുന്നവരെ വാണിജ്യ ഇറക്കുമതിക്കാരായി കണക്കാക്കി കർശനമായ വെറ്ററിനറി പരിശോധനകൾക്കും കസ്റ്റംസ് നടപടികൾക്കും വിധേയരാക്കുമെന്നും അതോറിറ്റി മുന്നറിയിപ്പ് നൽകി.