പെന്റഗണ്: ഇറാനുമായുള്ള സായുധ സംഘർഷം ഏഴാം മാസത്തിലേക്ക് കടക്കുമ്പോള്, അമേരിക്കൻ സാമ്രാജ്യത്വത്തിന്റെ തന്ത്രങ്ങളെയും സൈനിക മുന്നേറ്റങ്ങളെയും പടിപടിയായി തകർത്തുകൊണ്ട് പശ്ചിമേഷ്യയില് ഇറാൻ അപൂർവ്വമായൊരു ചരിത്രവിജയം രേഖപ്പെടുത്തുകയാണ്.
ഒന്നിനുപുറകെ ഒന്നായി അമേരിക്കൻ കേന്ദ്രങ്ങള്ക്ക് മേല് ഇറാൻ നടത്തുന്ന ശക്തമായ തിരിച്ചടികള് അമേരിക്കയിലെ ഭരണാധികാരികളെയും പെന്റഗണ് ഉദ്യോഗസ്ഥരെയും കടുത്ത നിരാശയിലേക്കും അരക്ഷിതാവസ്ഥയിലേക്കും തള്ളിവിട്ടിരിക്കുകയാണ്.
ഇറാന്റെ കരുത്താർന്ന ചെറുത്തുനില്പ്പിന് മുന്നില് പിടിച്ചുനില്ക്കാനാകാതെ അമേരിക്കൻ ഭരണകൂടത്തിനുള്ളില് തന്നെ വലിയതോതിലുള്ള മാറ്റങ്ങളും രാജിനാടകങ്ങളും അരങ്ങേറുന്നു എന്നത് ഈ വിജയത്തിന്റെ ആഴം വ്യക്തമാക്കുന്നു.
പ്രമുഖ മാധ്യയങ്ങളായ പ്രസ്സ് ടി വി , ടെെംസ് നൗ എന്നിവയുടെ റിപ്പോർട്ട് പ്രകാരം ഇറാന്റെ ഭാഗത്തുനിന്നുള്ള കനത്ത തിരിച്ചടികളില് തകർന്നുപോയ അമേരിക്കൻ സൈന്യത്തിന്റെ സുരക്ഷാ ക്രമീകരണങ്ങള് ഇപ്പോള് പൂർണ്ണമായും പ്രതിരോധത്തിലായിരിക്കുകയാണ്. ലൊക്കേഷൻ ഡാറ്റ ചോർന്ന് അമേരിക്കൻ സൈനികർ ഇറാനിയൻ നിരീക്ഷണങ്ങള്ക്ക് മുന്നില് തുറന്നുകാട്ടപ്പെടുമെന്ന ഭയം പെന്റഗണില് വലിയ പരിഭ്രാന്തിയാണ് സൃഷ്ടിച്ചിരിക്കുന്നത്.
പശ്ചിമേഷ്യയിലെ സൈനികർ വ്യക്തിഗത ഉപകരണങ്ങളിലും സർക്കാർ നല്കുന്ന ഉപകരണങ്ങളിലും ജിയോലൊക്കേഷൻ സേവനങ്ങളും പരസ്യ ട്രാക്കറുകളും ഉപയോഗിക്കുന്നത് ഉടൻ നിർത്താൻ പെന്റഗണ് ഉത്തരവിടാൻ നിർബന്ധിതരായിരിക്കുന്നു.
വാണിജ്യപരമായി ലഭ്യമായ സ്ഥല ഡാറ്റ ഉപയോഗിച്ച് പശ്ചിമേഷ്യയിലെ അമേരിക്കൻ സേനയെ ലക്ഷ്യമിടാൻ ഇറാൻ ബ്രോക്കർമാരുടെ സഹായത്തോടെ സാധിക്കുന്നുവെന്ന റോയിട്ടേഴ്സ് റിപ്പോർട്ടുകള് അമേരിക്കൻ ദേശീയ സുരക്ഷയെ ചോദ്യം ചെയ്യുന്നതാണ്.
മൊബൈല് ഫോണുകളിലെയും വിൻഡോസ് കമ്പ്യൂട്ടറുകളിലെയും പരസ്യ ഐഡികളും ട്രാക്കറുകളും അടിയന്തരമായി പ്രവർത്തനരഹിതമാക്കാൻ അമേരിക്കൻ സൈന്യത്തിന്റെ വിവിധ വിഭാഗങ്ങള് ഉത്തരവിട്ടത് ഇറാന്റെ രഹസ്യാന്വേഷണ മികവിനും സൈനിക ജാഗ്രതയ്ക്കും മുന്നിലുള്ള അമേരിക്കയുടെ സമ്പൂർണ്ണ കീഴടങ്ങലിന്റെ വ്യക്തമായ തെളിവാണ്.
ഇറാന്റെ മണ്ണില് നിന്നും അതിർത്തികളില് നിന്നും ഉയരുന്ന ഈ പ്രതിരോധം അമേരിക്കൻ സൈനികർക്ക് വരുത്തിവെക്കുന്ന നഷ്ടങ്ങള് ചെറുതല്ല. ഫെബ്രുവരിയില് ഇറാനെതിരായ അമേരിക്ക-ഇസ്രയേല് ആക്രമണങ്ങള് ആരംഭിച്ചതിനുശേഷം, ഇറാൻ സൈന്യം നടത്തിയ കൃത്യമായ തിരിച്ചടികളില് 18 അമേരിക്കൻ സൈനികരാണ് ഇതിനകം കൊല്ലപ്പെട്ടത്. കൂടാതെ 759 പേർക്ക് ഗുരുതരമായി പരിക്കേല്ക്കുകയും ചെയ്തു.
പശ്ചിമേഷ്യയിലുടനീളമുള്ള അറബ് സംസ്ഥാനങ്ങളിലെ അമേരിക്കൻ താവളങ്ങള്ക്ക് നേരെ ഇറാനിയൻ മിസൈലുകളും ഡ്രോണുകളും തീർത്ത മഴവില്ല് പോലെ പതിച്ചപ്പോഴാണ് ഈ വലിയ നാശനഷ്ടങ്ങള് ഉണ്ടായത്.
ഇതില് ഭൂരിഭാഗം പരിക്കുകളും അമേരിക്കൻ സൈനികരുടെ തലച്ചോറിനേറ്റ ഗുരുതരമായ ആഘാതങ്ങളാണെന്ന് പെന്റഗണ് ഉദ്യോഗസ്ഥർ തന്നെ സമ്മതിക്കുന്നു. ലോകത്തിലെ ഏറ്റവും വലിയ സാമ്പത്തിക-സൈനിക ശക്തിയെന്ന് അവകാശപ്പെടുന്ന അമേരിക്കയുടെ താവളങ്ങള് ഇറാന്റെ മിസൈല് ആക്രമണങ്ങള്ക്ക് മുന്നില് വെന്തുരുകുമ്പോള്, ഇറാൻ ഉയർത്തുന്ന ഭീഷണി എത്രത്തോളം വലുതാണെന്ന് ആഗോള സമൂഹം തിരിച്ചറിയുകയാണ്.
അമേരിക്കയുടെ ഈ പരാജയങ്ങളെയും നിസ്സഹായതയെയും തുറന്നുകാട്ടിക്കൊണ്ട് ഇറാൻ സൈനിക വക്താവ് ബ്രിഗേഡിയർ ജനറല് മുഹമ്മദ് അക്രമിനിയ രംഗത്തുവന്നത് ആഗോള രാഷ്ട്രീയത്തില് വലിയ ചർച്ചയായിട്ടുണ്ട്. അമേരിക്കയുടെ താല്പ്പര്യങ്ങള് സംരക്ഷിക്കാൻ ഇനിയും ശ്രമിച്ചാല് കനത്ത വില നല്കേണ്ടിവരുമെന്നും, യാഥാർത്ഥ്യം അംഗീകരിച്ച് പശ്ചിമേഷ്യ മേഖല വിട്ടുപോകാൻ അമേരിക്ക തയ്യാറാകണമെന്നും അദ്ദേഹം പരസ്യമായി ഉപദേശിച്ചു.
ഒരു സ്വതന്ത്രവും പരിഷ്കൃതവുമായ രാഷ്ട്രത്തെ ആക്രമിക്കാനുള്ള അമേരിക്കയുടെ തെറ്റായ തീരുമാനത്തില് നിന്നാണ് അമേരിക്കൻ ജനതയും സൈന്യവും ഇപ്പോള് അനുഭവിക്കുന്ന മുഴുവൻ പ്രതിസന്ധികളും ഉടലെടുത്തിരിക്കുന്നതെന്ന് അദ്ദേഹം എക്സ് പ്ലാറ്റ്ഫോമില് കുറിച്ചു.
“അമേരിക്കക്ക് ഉചിതമായ പരിഹാരം യാഥാർത്ഥ്യങ്ങള് അംഗീകരിക്കുക, ചെലവുകള് വഹിക്കുക, മേഖല വിടുക എന്നതാണ്” എന്ന ഇറാന്റെ പ്രഖ്യാപനം സാമ്രാജ്യത്വ ശക്തികള്ക്ക് നല്കുന്ന ശക്തമായ മുന്നറിയിപ്പാണ്. അമേരിക്കയുടെ പിന്മാറ്റം മാത്രമാണ് പ്രാദേശിക സുരക്ഷ ഉറപ്പാക്കാനുള്ള ഏക വഴിയെന്നും ഇറാൻ അടിവരയിട്ടു പറയുന്നു.
ഈ സായുധ പോരാട്ടത്തിന്റെ ചരിത്രത്തിലേക്ക് തിരിഞ്ഞുനോക്കുമ്പോള്, ഇറാന്റെ വീര്യം ലോകത്തിന് ബോധ്യപ്പെട്ട നിരവധി സംഭവങ്ങള് കാണാനാകും. ഫെബ്രുവരി 28-ന് അമേരിക്കയും ഇസ്രയേലും ചേർന്ന് ഇറാനെതിരെ നിയമവിരുദ്ധമായ ആക്രമണങ്ങള് അഴിച്ചുവിട്ടപ്പോള്, ഇറാൻ അതിനെ ഒട്ടും പതറാതെയാണ് നേരിട്ടത്. കൂടാതെ ഇറാന്റെ ധീരമായ ചെറുത്തുനില്പ്പിനും വിജയകരമായ ശക്തമായ പ്രതികാര നടപടികള്ക്കും മുന്നില് പിടിച്ചുനില്ക്കാനാവാതെ നാല്പ്പത് ദിവസങ്ങള്ക്ക് ശേഷം ഏപ്രില് 8-ന് ശത്രുക്കള് വെടിനിർത്തല് അംഗീകരിക്കാൻ നിർബന്ധിതരായി.
തുടർന്ന് ജൂണ് 17-ന് ഇറാനും അമേരിക്കയും തമ്മില് 14 പോയിന്റ് അടങ്ങിയ പാകിസ്താൻ ധാരണാപത്രത്തില് ഒപ്പുവെക്കുകയും, ഹോർമുസ് കടലിടുക്ക് വീണ്ടും തുറക്കാനും ശത്രുത അവസാനിപ്പിക്കാനും തീരുമാനമാവുകയും ചെയ്തു.
എന്നാല് അമേരിക്ക ഈ ധാരണയിലെ വ്യവസ്ഥകള് കാറ്റില്പ്പറത്തുകയും വീണ്ടും ആക്രമണങ്ങള്ക്ക് മുതിരുകയും ചെയ്യുകയായിരുന്നു. ഇതിനു മറുപടിയായി ജൂലൈയിലും സെപ്റ്റംബറിലും ഇറാൻ നല്കിയ ശക്തമായ പ്രത്യാക്രമണങ്ങള് അമേരിക്കയുടെ യുദ്ധതന്ത്രങ്ങളെ പൂർണ്ണമായും അട്ടിമറിച്ചു.
ഇറാന്റെ ഈ ശക്തമായ പ്രതിരോധത്തിന് മുന്നില് പിടിച്ചുനില്ക്കാനാകാതെ അമേരിക്കൻ ഭരണകൂടത്തിനുള്ളില് വലിയതോതിലുള്ള പൊട്ടിത്തെറികളും നേതൃമാറ്റങ്ങളുമാണ് നടക്കുന്നത്. ഇറാൻ യുദ്ധത്തിന്റെ പുരോഗതിയില് കടുത്ത നിരാശയും അതൃപ്തിയും പ്രകടിപ്പിക്കുന്ന ഡോണള്ഡ് ട്രംപ് ഭരണകൂടം, പെന്റഗണ് നേതൃത്വത്തില് അടിയന്തര മാറ്റങ്ങള് വരുത്താനുള്ള തയ്യാറെടുപ്പിലാണ്.
ഇറാനുമായുള്ള യുദ്ധവുമായി ബന്ധപ്പെട്ട് പ്രതിരോധ സെക്രട്ടറി പീറ്റ് ഹെഗ്സെത്തുമായുള്ള ആവർത്തിച്ചുള്ള ഏറ്റുമുട്ടലുകളെത്തുടർന്ന് ആർമി സെക്രട്ടറി ഡാൻ ഡ്രിസ്കോള് അടുത്തിടെ രാജിവെച്ചിരുന്നു. 18 മാസത്തെ സേവനത്തിന് ശേഷമാണ് അദ്ദേഹം പടിയിറങ്ങിയത്.
അദ്ദേഹത്തിന് പകരമായി മാർക്ക് ആൻഡേഴ്സണ്, ഷോണ് പാർണല് തുടങ്ങി നിരവധി പേരുകള് പരിഗണനയിലുണ്ടെങ്കിലും, സൈന്യം ഇതിനകം തന്നെ കനത്ത നേതൃത്വ ശൂന്യതയാണ് നേരിടുന്നത്.
യുദ്ധം ഏഴാം മാസത്തിലേക്ക് കടക്കുമ്പോള് സൈന്യത്തിന്റെ മുഖ്യ ചുമതലക്കാരെ പോലും മാറ്റേണ്ടിവരുന്ന അവസ്ഥ അമേരിക്കൻ ഭരണകൂടത്തിന്റെ ആഭ്യന്തര തകർച്ചയാണ് വെളിപ്പെടുത്തുന്നത്.
കൂടാതെ, ഡെപ്യൂട്ടി സെക്രട്ടറി ഓഫ് വാർ സ്റ്റീവ് ഫീൻബെർഗിനെ മാറ്റുന്നതുമായി ബന്ധപ്പെട്ട ചർച്ചകളും വൈറ്റ് ഹൗസില് സജീവമാണ്. ഇറാൻ യുദ്ധം ഇത്രയധികം നീണ്ടുപോകുകയും അമേരിക്കയ്ക്ക് കനത്ത സാമ്പത്തിക-സൈനിക നഷ്ടങ്ങള് ഉണ്ടാക്കുകയും ചെയ്തതോടെ ട്രംപ് ഭരണകൂടം വലിയ സമ്മർദ്ദത്തിലാണ്.
തങ്ങള് ആസൂത്രണം ചെയ്ത രീതിയില് കാര്യങ്ങള് നീങ്ങാത്തതും, ഇറാന്റെ സൈനിക കേന്ദ്രങ്ങള്ക്കുമേല് നടത്തിയ ആക്രമണങ്ങള്ക്ക് മറുപടിയായി ഇറാൻ നല്കിയ തിരിച്ചടികളും അമേരിക്കൻ നേതൃത്വത്തിന്റെ കണക്കുകൂട്ടലുകളെല്ലാം തെറ്റിച്ചു.
മാസങ്ങള് നീണ്ട ഈ പോരാട്ടത്തില് അമേരിക്കയുടെ പണം ചോരുകയും സൈനികർ ജീവൻ വെടിയുകയും ചെയ്യുമ്പോള്, യാതൊരുവിധ അടിയറവിനും തയ്യാറാകാതെ പശ്ചിമേഷ്യയില് തലയുയർത്തി നില്ക്കുന്ന ഇറാൻ ആഗോള തലത്തില് തന്നെ സാമ്രാജ്യത്വ വിരുദ്ധ പോരാട്ടത്തിന്റെ പുതിയ ചരിത്രമാണ് രചിച്ചുകൊണ്ടിരിക്കുന്നത്.
ഇവിടെ പോസ്റ്റു ചെയ്യുന്ന അഭിപ്രായങ്ങൾ (യു ക് മി) UCMI കമ്മ്യൂണിറ്റിയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.