സൗദി: ലോകത്തെ വിറപ്പിച്ചുകൊണ്ട് മിഡില് ഈസ്റ്റില് വീണ്ടും കനത്ത ആക്രമണം. യമനിലെ പ്രധാന തുറമുഖവും സൗദി അറേബ്യയുടെ എണ്ണശുദ്ധീകരണ ശാലയും ലക്ഷ്യമാക്കി ഹൂതി വിമതർ നടത്തിയ ഞെട്ടിക്കുന്ന ആക്രമണത്തില് നാലു സൈനികരടക്കം ഏഴുപേർ കൊല്ലപ്പെട്ടു.
തുറമുഖത്തെ കെട്ടിടങ്ങള്ക്കും മറ്റ് അടിസ്ഥാനസൗകര്യങ്ങള്ക്കും സാരമായ കേടുപാടുകള് സംഭവിച്ചിട്ടുണ്ടെന്നും, ഭക്ഷ്യവസ്തുക്കള് അടക്കമുള്ള ചരക്കുകള് പൂർണ്ണമായി നശിച്ചതായും സർക്കാർ പിന്തുണയുള്ള ദേശീയ പ്രതിരോധ സേന സ്ഥിരീകരിച്ചു. ഹൂതി നിയന്ത്രണത്തിലുള്ള ഹൊദൈദ തുറമുഖം ഒഴിവാക്കി ചരക്കുഗതാഗതം സാധ്യമാക്കാൻ നവീകരിച്ച യെമെനിലെ ഏറ്റവും വലിയ തുറമുഖമാണ് ഇപ്പോള് ആക്രമണത്തിനിരയായിരിക്കുന്നത്.
ഇതിനുപുറമെ, സൗദി അറേബ്യയുടെ ദേശീയ എണ്ണക്കമ്പനിയായ അരാംകോയുടെ ജിസാൻ എണ്ണ ശുദ്ധീകരണ ശാലയ്ക്കുനേരേയും ഹൂതികളുടെ ഡ്രോണാക്രമണമുണ്ടായി. ഞായറാഴ്ച പുലർച്ചെയുണ്ടായ ഈ ആക്രമണത്തില് ശുദ്ധീകരണ ശാലയ്ക്ക് തീപിടിച്ചെങ്കിലും, അധികൃതരുടെ സമയോചിതമായ ഇടപെടല് മൂലം വൻ ദുരന്തം ഒഴിവാകുകയും തീയണയ്ക്കാൻ സാധിക്കുകയും ചെയ്തു. ഭാഗ്യവശാല് ഇവിടെ ആളപായം റിപ്പോർട്ട് ചെയ്തിട്ടില്ല. വടക്കുപടിഞ്ഞാറൻ യെമനിലേക്ക് സൗദി ഡ്രോണുകള് കടന്നുകയറുന്നതിനുള്ള മറുപടിയാണ് ഈ ആക്രമണങ്ങളെന്ന് ഹൂതികള് ഔദ്യോഗികമായി അറിയിച്ചിട്ടുണ്ട്.
2014-ല് ആഭ്യന്തര യുദ്ധത്തിലൂടെ യമന്റെ തലസ്ഥാനമായ സനാ ഹൂതികള് പിടിച്ചെടുത്തതുമുതല് സൗദി നേതൃത്വത്തിലുള്ള സഖ്യസേനയുമായി കടുത്ത ഏറ്റുമുട്ടലിലാണ്. 2022-ല് ഐക്യരാഷ്ട്രസഭയുടെ നേതൃത്വത്തില് നിലവില്വന്ന താത്കാലിക സമാധാന കരാറാണ് ഇപ്പോള് ഇത്തരം ആക്രമണങ്ങളിലൂടെ പൂർണ്ണമായും തകർന്നിരിക്കുന്നത്.
ചെങ്കടലിലെ ബാബാ അല് മാണ്ടബ് കടലിടുക്കില് സൗദിക്ക് ഉപരോധം ഏർപ്പെടുത്തിക്കൊണ്ട് കപ്പലുകള്ക്ക് നേരെയും ഹൂതികള് ആക്രമണം അഴിച്ചുവിടുന്നത് മേഖലയിലെ സമാധാനാന്തരീക്ഷത്തെയാണ് ഗുരുതരമായി ബാധിക്കുന്നത്.
ഇവിടെ പോസ്റ്റു ചെയ്യുന്ന അഭിപ്രായങ്ങൾ (യു ക് മി) UCMI കമ്മ്യൂണിറ്റിയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.