വാഷിംഗ്ടണ്: 2026-27 അധ്യായന വർഷത്തില് അമേരിക്കൻ കോളേജുകളിലേക്കും സർവ്വകലാശാലകളിലേക്കും അപേക്ഷിക്കുന്ന ഇന്ത്യൻ വിദ്യാർത്ഥികളുടെ എണ്ണത്തില് 14 ശതമാനത്തിന്റെ കുറവുണ്ടായതായി പുതിയ റിപ്പോർട്ട്.
ഇത് മൂലം രാജ്യത്തിന്റെ സാമ്പത്തിക സംഭാവനകളില് 3.4 ശതകോടി ഡോളറിന്റെ നഷ്ടവും 40,000-ത്തോളം തൊഴിലവസരങ്ങളുടെ കുറവും ഉണ്ടായേക്കാം.
അമേരിക്കയിലേക്ക് ഏറ്റവും കൂടുതല് വിദ്യാർത്ഥികളെ അയക്കുന്ന രണ്ട് പ്രധാന രാജ്യങ്ങളാണ് ഇന്ത്യയും ചൈനയും. ഈ ഇരുരാജ്യങ്ങളിലും വിദ്യാർത്ഥി വിസ അപ്പോയിന്റ്മെന്റുകള് ലഭിക്കുന്നതിലെ പരിമിതികളും വൈകലുമാണ് അപേക്ഷകരുടെ എണ്ണം കുറയാനുള്ള പ്രധാന കാരണങ്ങളിലൊന്നായി റിപ്പോർട്ട് ചൂണ്ടിക്കാണിക്കുന്നത്.
അന്താരാഷ്ട്രതലത്തില് യുഎസ് വിദ്യാഭ്യാസത്തോടുള്ള താല്പര്യത്തില് പൊതുവെയുണ്ടായ മന്ദഗതിയുടെ പ്രതിഫലനമാണ് ഇൻഡ്യയില് നിന്നുള്ള അപേക്ഷകളിലെ ഈ ഇടിവ്. കോമണ് ആപ്പ് വഴിയുള്ള അന്താരാഷ്ട്ര അപേക്ഷകളില് 2026-27 സീസണില് മൊത്തത്തില് 9 ശതമാനത്തിന്റെ കുറവുണ്ടായിട്ടുണ്ട്.
അസ്സോസിയേഷൻ ഓഫ് അമേരിക്കൻ യൂണിവേഴ്സിറ്റീസ് ഡാറ്റാ എക്സ്ചേഞ്ചിന്റെ കണക്കുകള് പ്രകാരം, 2026 ഫോള് സീസണില് യു.എസ് ഡോക്ടറല് പ്രോഗ്രാമുകളിലേക്കുള്ള അന്താരാഷ്ട്ര അപേക്ഷകളില് 21 ശതമാനം കുറവുണ്ടായി. ഫെഡറല് ഗവേഷണ ഫണ്ടിംഗിനെക്കുറിച്ചുള്ള അനിശ്ചിതത്വങ്ങള്ക്കിടയില് അന്താരാഷ്ട്ര പ്രവേശനം 17 ശതമാനവും മൊത്തത്തിലുള്ള ഡോക്ടറല് പ്രവേശനം 15 ശതമാനവും കുറഞ്ഞു.
ഇൻസ്റ്റിറ്റ്യൂട്ട് ഓഫ് ഇന്റർനാഷണല് എഡ്യൂക്കേഷന്റെ സ്പ്രിംഗ് 2026 സർവേയില് പങ്കെടുത്ത മൂന്നില് രണ്ട് യു.എസ് ഉന്നത വിദ്യാഭ്യാസ സ്ഥാപനങ്ങളും 2026-27 വർഷത്തില് അന്താരാഷ്ട്ര വിദ്യാർത്ഥികളുടെ പ്രവേശനം ഇനിയും കുറയുമെന്നാണ് പ്രതീക്ഷിക്കുന്നത്. ചില സ്ഥാപനങ്ങള് ബിരുദാനന്തര ബിരുദ പ്രവേശനത്തില് 40 ശതമാനം വരെ കുറവ് പ്രവചിക്കുന്നുണ്ട്.
ഇവിടെ പോസ്റ്റു ചെയ്യുന്ന അഭിപ്രായങ്ങൾ (യു ക് മി) UCMI കമ്മ്യൂണിറ്റിയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.