ന്യൂഡല്ഹി: ഒരു രാജ്യം ഒരു തിരഞ്ഞെടുപ്പ് ബില്ലുകള്ക്കായുള്ള പാർലമെന്റിന്റെ സംയുക്ത സമിതി വിവിധ സംസ്ഥാനങ്ങളിലെ മുഖ്യമന്ത്രിമാരുമായി ആശയവിനിമയം നടത്താനിരിക്കെ നിർണായക നീക്കവുമായി എൻഡിഎ.
എൻഡിഎ ഭരിക്കുന്ന 22 സംസ്ഥാനങ്ങളില് 11 എണ്ണത്തില് 2029 ലെ ലോക്സഭാ തിരഞ്ഞെടുപ്പിന് മുമ്പ് വരുന്ന രണ്ട് വർഷത്തിനുള്ളില് തിരഞ്ഞെടുപ്പ് നടക്കുമെന്നാണ് റിപ്പോർട്ട്. എൻഡിഎ ഭരിക്കുന്ന ആന്ധ്രാപ്രദേശ്, അരുണാചല് പ്രദേശ്, സിക്കിം, ഒഡീഷ എന്നീ സംസ്ഥാനങ്ങളില് ലോക്സഭ തിരഞ്ഞെടുപ്പിനൊപ്പമാണ് നിയമസഭ തിരഞ്ഞെടുപ്പും നടക്കുന്നത്.
2034ല് ലോക്സഭയിലേക്കും എല്ലാ നിയമസഭകളിലേക്കും ഒരേസമയം തിരഞ്ഞെടുപ്പുകള് നടത്തുന്നതിന് വഴിയൊരുക്കുന്ന ബില്ലുകള് പരിഗണിക്കുന്നതിനായി 2024 ഡിസംബറിലാണ് സമിതി രൂപീകരിച്ചത്. ഈ സമിതി വിവിധ സംസ്ഥാനങ്ങള് സന്ദർശിച്ചുവരികയാണ്. ഇതിനിടെയാണ് എൻഡിഎയുടെ നീക്കം. ഈ വർഷത്തെ ശീതകാല സമ്മേളനത്തില് റിപ്പോർട്ട് സമർപ്പിക്കുമെന്നാണ് പ്രതീക്ഷിക്കുന്നത്.
അടുത്ത രണ്ട് വർഷങ്ങളില് എൻ.ഡി.എ സംസ്ഥാന സർക്കാരുകളില് അധികാരം നിലനിർത്തുകയാണെങ്കില് മന്ത്രിസഭയുടെ ശുപാർശപ്രകാരം അതാത് ഗവർണർമാർക്ക് 2029 ജനുവരിയോടെ ഈ 22 സംസ്ഥാനങ്ങളിലെയും നിയമസഭകള് പിരിച്ചുവിടാൻ സാധിക്കുമെന്ന് ഒരു സ്രോതസിനെ ഉദ്ധരിച്ച് ഇന്ത്യൻ എക്സ്പ്രസ് റിപ്പോർട്ട് ചെയ്യുന്നു.
ഭരണഘടനയുടെ ആർട്ടിക്കിള് 174 (2)(ബി) പ്രകാരം നിയമസഭ പിരിച്ചുവിടാൻ ഗവർണർക്ക് അധികാരമുണ്ട്. മന്ത്രിസഭയുടെ ശുപാർശപ്രകാരമോ അല്ലെങ്കില് സർക്കാരിന് ഭൂരിപക്ഷം നഷ്ടപ്പെടുമ്പോഴോ ആണ് ഗവർണർ സാധാരണയായി ഇങ്ങനെ ചെയ്യുന്നത്. നിയമസഭ പിരിച്ചുവിട്ടാല് ആറ് മാസത്തിനകം തിരഞ്ഞെടുപ്പ് നടത്തണമെന്ന് 1950ലെ ജനപ്രാതിനിധ്യ നിയമം വ്യവസ്ഥ ചെയ്യുന്നത്. അതേസമയം, അഭ്യൂഹങ്ങളോട് പ്രതികരിക്കാനില്ലെന്ന് കോണ്ഗ്രസ് വ്യക്തമാക്കി.
ഇവിടെ പോസ്റ്റു ചെയ്യുന്ന അഭിപ്രായങ്ങൾ (യു ക് മി) UCMI കമ്മ്യൂണിറ്റിയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.