ന്യൂഡൽഹി: ഓണത്തോടനുബന്ധിച്ച് ലോകമെമ്പാടുമുള്ള മലയാളി സമൂഹത്തിന് ഹൃദയംഗമമായ ആശംസകൾ നേർന്ന് രാഷ്ട്രപതി ദ്രൗപതി മുർമുവും പ്രധാനമന്ത്രി നരേന്ദ്ര മോദിയും.
സന്തോഷത്തിന്റെയും ഒത്തൊരുമയുടെയും സമൃദ്ധിയുടെയും മനോഭാവത്തിന് ഓണം കൂടുതൽ കരുത്തുപകരട്ടെയെന്ന് പ്രധാനമന്ത്രി ആശംസിച്ചു. മലയാളത്തിലും ഇംഗ്ലീഷിലുമായാണ് പ്രധാനമന്ത്രി തന്റെ ആശംസാ സന്ദേശം പങ്കുവെച്ചത്. ലോകമെമ്പാടും വലിയ ആവേശത്തോടെ ആഘോഷിക്കപ്പെടുന്ന ഊർജസ്വലമായ ഉത്സവമാണ് ഓണമെന്ന് അദ്ദേഹം കൂട്ടിച്ചേർത്തു.കേരളത്തിന്റെ സമ്പന്നമായ പൈതൃകത്തിന്റെയും പാരമ്പര്യത്തിന്റെയും ഉത്തമ ഉദാഹരണമാണ് ഓണമെന്ന് രാഷ്ട്രപതി ദ്രൗപതി മുർമു തന്റെ ആശംസാ സന്ദേശത്തിൽ വ്യക്തമാക്കി. സമ്പന്നമായ സംസ്കാരത്തിന്റെയും സാഹോദര്യത്തിന്റെയും ഉത്സവമാണ് ഇതെന്ന് ഓർമ്മിപ്പിച്ച രാഷ്ട്രപതി, വള്ളംകളി, തനത് കലാരൂപങ്ങൾ, സംഗീതം, കായിക മത്സരങ്ങൾ എന്നിവയെല്ലാം കേരളത്തിന്റെ മൂല്യങ്ങളും സംസ്കാരവും വിളിച്ചോതുന്നവയാണെന്നും കൂട്ടിച്ചേർത്തു.
ഓണാഘോഷങ്ങൾ വ്യക്തികൾക്ക് സന്തോഷവും സമാധാനവും സമൃദ്ധിയും ആരോഗ്യവും പ്രദാനം ചെയ്യുന്നതിനൊപ്പം ദേശീയ പുരോഗതിക്ക് അനിവാര്യമായ ഒന്നാണെന്നും രാഷ്ട്രപതി ചൂണ്ടിക്കാട്ടി. രാജ്യത്തിന്റെ സാംസ്കാരിക വൈവിധ്യത്തെയും സാഹോദര്യത്തെയും എടുത്തുകാണിക്കുന്ന ഈ ആശംസാ സന്ദേശങ്ങൾ ആഗോളതലത്തിലുള്ള മലയാളി സമൂഹത്തിന് വലിയ സന്തോഷവും അഭിമാനവുമാണ് പകർന്നുനൽകുന്നത്




ഇവിടെ പോസ്റ്റു ചെയ്യുന്ന അഭിപ്രായങ്ങൾ (യു ക് മി) UCMI കമ്മ്യൂണിറ്റിയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.